NotabelTV na TV11

Willemstad - Djasabra último tabatin transmishon di e último programa di NotabelTV na Telecuraçao, den su promé temporada kual tabata di desèmber 2008 pa mart 2009.
E programa manera ta bisá popularmente a pega i tabatin bastante reakshon i petishon pa ripití e diferente programanan di NotabelTV.

NotabelTV ta un programa oudiovisual variá produsí i presentá pa Reyna Joe, ku ta kontené un entrevista ku un persona ku tin algu interesante di konta i ku por ta inspirashon espesialmente pa hóbennan. Tambe tin un sekshon di Fundashon Konsiente den kua ta interkambiá di idea ku un hende konsiente i kende por kompartí su ideanan i vishon ku komunidat.
‘Kaso Notabel’ ta otro sekshon den kua ta para ketu na komportashonnan ku no ta benefisiá e hende ku ke bai dilanti den su trabou i den su bida sosial. Tambe tin den e promé temporada di NotabelTV un sekshon riba ‘Salú Seksual’ den kua seksuológo dr. Fredeslinda Fret Ramirez ta duna opinion i kontesta riba preguntanan relashoná ku seksualidat.
I tambe NotabelTV ta duna atenshon na e konferensha anual di hende muhé na Kòrsou kual konferensha tin komo meta pa yuda e hende muhé ku ta traha i ku ke sigui bai dilanti,  oportunidat pa haña informashon i konosementu pa e por superá su mes.

Despues di a kaba e promé temporada di e programa NotabelTV na Telecuraçao ta bai ripití e temporada kompleto awor na TV11 kuminsando djaweps 2 di aprel 2009. NotabelTV ta bai pasa pues te ku dia 30 di yüli 2009 tur djaweps di 16.00 pa 17.00 i ta keda ripití tur djasabra anochi di 22.00 pa 23.00.
Un gradisimentu di kurason ta bai pa tur apoyo, reakshon, sosten, sugerensia i patrosinahe duná na realisashon di NotabelTV.
E di dos temporada di NotabelTV lo kuminsá mas den fin di aña i lo trata na trese atrobe tópikonan variá, interesante i ku ta sirbi na konsientisá e televidente.
Ta bai hasi sigur sigur tambe di sugerensia di televidentenan pa asina ei por mantené NotabelTV interesante pa esnan ku ta siguié.

Por haña mas informashon di NotabelTV riba www.notabel.com i por komuniká ku produktor di NotabelTV, Reyna Joe na info@notabel.com.




Kòrsou, 4 di desèmber 2008
 

NotabelTV ta kuminsá djasabra awor

Willemstad – NotabelTV ta e programa di televishon ku ta kuminsá djasabra dia 6 di desèmber 2008, 21.00 na Telecuraçao. Ta trata aki di un programa informativo, variá, produsí i presentá pa Reyna Joe.
Reyna Joe a kuminsá su karera periodístiko na aña 1977 na Radio Nederland Wereldomroep na Hilversum, Ulanda despues di su estudio di periodismo. Na aña 1979 el a drenta servisio di departamentu di notisia di Telecuraçao i el a traha 13 aña largu na e planta di televishon. Durante di su temporada na Telecuraçao, Reyna Joe a traha den departamentu di notisia tantu komo periodista i komo presentadó di notisia i tambe el a traha diferente programa manera e.o. Aktualidat, Fin di Siman, Muhé Informá, Lesa Buki i transmishonnan polítiko manera e.o. anochinan di resultado di elekshon.
E tabata tambe e.o. den e tim di produkshon di e dokumental antiano ‘Antilliaans Verhaal’, e pelíkula Boka Sarantonio i a dirigí produkshon di ‘E outo komputarisá’.
Tabata durante ku e tabata den servisio na Telecuraçao ku el a haña oportunidat pa hasi un entrenamentu ekstenso di  produkshon di programanan oudiovisual i di pelíkula na Hollywood.

Despues el a skohe pa bai traha den su propio empresa Bright Ideas & Services kontinuando ku dunamentu di servisio i trabounan di komunikashon i di publisidat ku a enserá tambe vários produkshon pa televishon i otro programanan promoshonal oudiovisual. Den NotabelTV e produktor i presentadó por kombiná su eksperensia i konosementu lokal i internashonal ku tópikonan i susesonan interesante i relevante ku enfoke riba desaroyo di komunidat di Kòrsou. Durashon di NotabelTV lo ta di desèmber 2008 pa mart 2009.

NotabelTV ta kargá pa un tim di realisashon ku huntu ta sòru pa e programa ta unu ku por benefisiá televidentenan i esnan ku ta hasi e programa posibel. E tim ta konta ku sosten di Hart & Private Production pa realisashon tékniko i tambe di kamarógrafo Armand Hellement.



Riba e potrèt

por mira parti di e tim di NotabelTV ku ta di robes pa drechi Daniel Ferraro Biederman direktor di post produkshon, Reyna Joe produktor i presentadó, Ingrid Craane stilista i Griselda Mateo Medina, asistente di produkshon. 

                

http://konsiente.com



www.seksualidat.com



http://aboutwomenconference.com