29 di mart 2010

www.everyonecanbeamodel.com
Buskando ‘Kara Notabel 2010’

Willemstad - Di aprel pa desèmber 2010 tin un kampaña interesante i diferente pa haña e ‘Kara Notabel 2010’ titulá: ‘Everyone Can Be A Model’.
Ta trata aki di un inisiativa di everyonecanbeamodel.com i notabel.com pa asina ei duna chèns na esun ku ke ta un modelo pa e por haña chèns pa eksperensiá esei maske ta un biaha den su bida.
Brian Bozo Inostroza di Everyone Can be A Model i Reyna Joe di Notabel ta di opinion ku nan mester por haña un hende notabel ku por keda presentá den kampañanan publisitario i tambe komo personalidat riba website.
Esaki saliendo, manera e nòmber mes ta bisa for di e konvikshon ku tur hende por ta un modelo.

Un invitashon ta bai na tur hende riba 16 aña di bida; sin hasi distinshon di su sais, rasa, aparensia; pa partisipá na e ‘castingnan’ den kua ta selekshoná finalistanan ku ta partisipa na desèmber próksimo den un  show final.
Tur luna tin un ‘casting’ kaminda tur ku ke por bin duna nan informashon i laga saka nan potrèt. Despues di un preselekshon interno ta pone 6 prefinalista riba www.everyonecanbeamodel.com kaminda bishitantenan di e wèpsait por vota riba kua ta e dos finalistanan di e luna ei.
Tur luna ta bai ku e dos finalistanan na un sitio den Antia kaminda ta tene un asina yamá ‘fotoshoot’ profeshonal. Ta e potrètnan aki ta bai partisipá tambe den e final na desèmber ora elegí ‘Kara Notabel 2010’.

Promé 'casting' pa saka finalistanan pa kompetí pa ‘Kara Notabel 2010’ ta dia 3 di aprel 2010 di 12’or di mèrdia pa 2’or di atardi na KADEWE den Breedestraat Otrobanda. Djis presentá, duna bo informashonnan i laga saka bo potrèt. E dos finalistanan di luna di aprel mester bai dia 11 di aprel Klein Kòrsou, kaminda ta bai hasi e fotoshoot profeshonal. Mayornan mester firma di ta aprobá den kaso ku e partisipante ta bou di 18 aña.

Tur hende por ta un modelo, abo tambe pues partisipá. Pa mas informashon bishitá www.everyonecanbeamodel.com, www.notabel.com i riba http://www.facebook.com/home.php?#!/pages/Everyone-can-be-a-Model/307858902344?ref=ts.