Wak é, skuch'é i les'é: Notabel

e-Revista  © Edishon 8 - yanüari 2012                   

Abo ta Notabel?
                                                            
Apresiabel lesadó Notabel,

Ku mihó deseonan pa 2012 mi ta kontentu di por ofresébu nos promé e-Revista Notabel pa e aña aki. Prepará ku mesun dedikashon i intenshon pa abo por tin informashon ku por yuda abo komo profeshonal òf abo ku tin bo mes empresa.
 
Nos ta habri aña ku un rúbrika nobo ku ta Kontribushon Notabel (lesa aki reglanan pa ta den Kontribushon Notabel). Den Kontribushon Notabel tin espasio pa un persona òf instansia kontribuí ku un tópiko ku e ta konsiderá notabel sufisiente, pa kompartí ku abo lesadó notabel.
Nos promé Kontribushon Notabel ta di Sherwin Jansen kende ta dokumentando bida i historia di e famia artístiko Shearman.
Nos ta spera ku abo ku tambe tin algu di kompartí lo ta próksimamente den Kontribushon Notabel.
 
I nos ta sigui konta ku abo su reakshon den 2012 riba loke nos ta ofresé den bo e-Revista Notabel.
 
Bon aña meresí i keda notabel.

Reyna Joe
info@notabel.com

                        

 
Den e edishon aki nos tin e siguiente tópikonan:

A. Trabou i malesa
B. Diploma no ta sufisiente
C. Etiketa si bo mester hospedá den kas di hende
D. Kontribushon Notabel
E. Kon notabel abo ta? 
 

 About Women and Influence
2, 3, 4 di mart 2012
tin e di 9 konferensha anual di hende muhé na Kòrsou

About Women and Influence

Pa mas informashon: info@aboutwomenconference.com

A.Trabou i malesa
©Skibí pa Reyna Joe

Ta bèrdat ku bo no por diskutí salú di niun hende. Ni e dòkter ku nan ta konfia no ta outorisá di duna informashon riba nan kondishon médiko. E historia ta kambia sinembargo te asta ora ku esun ku ta malu mes no ke; na momentu ku e ta den servisio i ku pa enfermedat e no por bin traha, pero e dunadó di trabou mester pag’é tòg.
Esaki ta pone ku kada dunadó di trabou i esnan enkargá pa atendé ku  bienestar di empleado, mester duna atenshon na malesa di un empleado; pasobra nan malesa ta kosta e empresa.

Lamentablemente ta bèrdat ku muchu empleado ta mèldu malu simplemente komo dianan liber adishonal.
Komo ku esaki ta un konosementu públiko mester inkluí tambe den akuerdo di trabou ku kada empleado kon ta hasi na momentu di malesa banda di loke leinan eksistente ta bisa.
Realisá ku kada hende ku no bin traha sa masha bon ku e ta opstakulisando e trabou.

Ta p’esei un dunadó di trabou saliendo for di e punto di bista ku e empleado ta sinsero i no ta gaña malu; mester tuma su tempu i:
1. Buska pa sa kiko di bèrdat falta e empleado
2. Dokumentá loke ta pasando ku e empleado
3. Wak kon por akomodá e empleado ku i na trabou miéntras ku e ta malu
4. Eksigí pa e empleado bai ARBO
5. Chèk tur aspekto legal pa si e empleado no por traha i ku abo tin di sigui paga.

Pa mas informashon por tuma kontakto ku BISInc.

Hopi éksito den 2012 ku bo sosten humano den trabou

© Reyna Joe 2012
Pa pregunta òf reakshon primi aki
  
Pa e surtido di mas grandi di asesorio pa ofisina pa habri aña 2012 na òrdu i nèchi, ta na

mes bo mester ta!

 
  
 
B. Diploma no ta sufisiente
©Skibí pa Reyna Joe

Bo sa ku un diploma no ta tur kos i sigur no ta sufisiente si bo tin kos ta strobabu di realisá e karera di bo soño?
Bo ta kla prepará pa atendé ku tur sorto di hende na momentu ku bo tin bo diploma?
Ta korekto pa invertí den un hóben, dun’é tur speransa i ora ku e ta riba merkado laboral sea e no ta haña chèns pa drenta òf e no por realisá su soño profeshonal ku un trabou?
Pasobra kiko ke men ku hóbennan ku tin tur oportunidat i chèns ta resultá di ta profeshonalnan ku ménos chèns?

Kiko ta pasando
E realidat ta ku komo profeshonal bo ta hañabu den klase sosial mas haltu den komunidat.
Tin diferente investigashon hasí riba e fenómeno di impakto di klase sosial mas abou riba graduadónan universitario i nan karera.

Un investigashon hasí dor di Mick Matthys (http://www.vbsp.nl/download/CAwdEAwUUkBDWg==) a mustra kon hopi graduadó universitario ku a sali di e klase sosial obreril ta haña nan ku dos reto:
1. Nan mes klase sosial no ta komprondé nan i lo ke nan keda manera nan tabata
2. E klase sosial nobo ku nan por drenta no ta habrí pa akseptá nan.

Esaki ta resultá den e mester di hasi hopi esfuerso sin por progresá. I tambe di deseonan influensiá fuertemente dor di aspekto di status mará na e posishon di ta den e klase nobo sin bo famia.
Un punto sigur ku por stroba e profeshonal nobo ku a subi den klase ta e identifikashon fuerte ku étika di trabou di obreronan ku ta konsistí di traha duru i komo eksperto, kolegial i ku deskonfiansa; loke ta pone ku ta esnan di klase obreril tin preferensia fuerte pa ta profeshonal i ku nan no ta ambishoná fásilmente un posishon di liderazgo.

Opservando nos situashon lokal na Kòrsou i profeshonalnan den nos komunidat mi ta sugerí e.o. lo siguiente den kaso ku bo tin bo diploma i bo sa ku bo mester di e konosementu i komportashon sosial adishonal pa por traha benefisiosamente:
1. Akseptá ku bo mester traha mas duru simplemente pasobra bo entrada profeshonal no ta na mes nivel ku esnan ku bo a bin topa
2. Kuminsá na opservá esnan di e klase mas haltu ku bo a drenta
3. Imitá nan
4. Asosiá ku organisashonnan i aktividatnan ku pa bo posishon nobo ta korekto
5. Asosiá ku otronan meskos ku bo, union ta hasi forsa
6. Bisti un harnas imaginativo pa asina ei bo por enfrentá e ponementu na lugá ku lo bo rekonosé kada tantu tempu
7. Hamas lubidá ken bo ta i di unda bo a bini
8. Bai p’e!

I si bo ke mas informashon riba e tópiko importante aki lesa:

© Skibí pa Reyna Joe 2012
Pa pregunta òf reakshon primi aki


 

C. Etiketa si bo mester hospedá den kas di hende
©Skibí pa Reyna Joe

Bo mester bai di biahe òf bo ke bai di biahe. Kaminda bo ta bai tin un hende ku bo konosé òf nò, ku a ofresé pa en bes di bo bai keda den hotèl bo bin keda na su kas pasobra e tin un kamber bashí.
Si bo skohe pa hasié anto tene kuenta ku tur regla di etiketa i protokòl ora abo ta den kas di hende.

Pa kuminsá puntra kiko bo mester paga.
Si nan bisabu nada, sòru pa sea trit nan sigur un biaha pa bai kome den un restorant na drechi/karu; òf kumpra un bukèt di flor grandi pa nan, òf si nan tin yu regalá e yu ei algu di balor. Bo por simplemente tambe laga ora bo ta bai, un suma mínimal di $50 pa dia den e kamber ku bo a keda ku un nota di gratitut, si bo a kome i bebe riba nan gastu.

Hende, maske ku nan bisabu ku nan no ta kobrabu, ta spera si ku bo ta yuda kubri algun gastu òf sikiera ta demostrá bo apresio pa nan hospitalidat, sigur si nan no debebu nada!

Kòrda ku ta ku bon komunikashon nos ta tene tur porta habri, si nan no debebu nada!

©Skibí pa Reyna Joe
Pa pregunta òf reakshon primi aki
 

 


Bo empresa òf organisashon ke saka su mes newsletter/revista (digital)?
Bo ke skibi bo buki di aniversario?
Bo mester di un lema/slogan (nobo)?

Tuma kontakto ku BISInc i nos ta traha ku bo pa bo satisfakshon.

Primi aki pa hasi kontakto pa un sita inmediatamente.

 
 

D. Primi aki pa lesa e promé Kontribushon Notabel
                                                


E. I finalmente: kon notabel abo ta? 

Nos ke sa bo reakshon pero tambe kon notabel abo mes ta. Manda nos un e-mail na info@notabel.com ku bo informashon notabel i nos lo publik’é.
Banda di esaki nos lo apresiá si bo kompartí Notabel ku tur kolega, amigu i famia.
Sinembargo si bo ta bai publiká for di e-Revista Notabel òf referí n’e den kualke presentashon nos ta apresiá si bo tene kuenta ku nos derechi di outor menshonando semper ku bo a sak’é for di e-Revista Notabel©.

Nos ta apresiá si bo bishitá nos wèpsait www.notabel.com i ‘like’ i topa nos riba facebook.


Keda notabel...............

                          

Lesa aki edishonnan anterior................

                         

Riska skibi algu bon di Kòrsou
www.kosbonso.com
                        

                        

Lesamentu ta dushi, ta p'esei nos ta hasié!
Tur djadumingu atardi di 4'or pa 5.30'or, den Bright World Park

                       




©Tur derechi reservá 2012 - 2010
www.notabel.com - info@notabel.com - tel.: 5999 690 8899